Hættu við lán vegna Icesave

Fjárfestingabanki Evrópu hætti við að veita lán til Landsvirkjunar í júlí sl., sem átti að nýta til framkvæmda við Búðarhálsvirkjun vegna Icesavedeilunnar.

Viðskiptablaðið greinir frá þessu í dag og segir að upplýsingum þess efnis hafi verið var komið til íslenskra stjórnvalda og Landsvirkjunar. Í greininni segir einnig að stjórn bankans, sem er í eigu ríkja Evrópusambandsins hafi ekki verið einhuga í málinu en þó hafi verið ákveðið að lána ekki til Landsvirkjunar.

Fjármálaráðherrar ESB ríkjanna sitja í yfirstjórn bankans, þar á meðal ráðherrar Bretlands og Hollands. Blaðið segir að Landsvirkjun leiti nú fyrir sér með fjármögnun á erlendum mörkuðum.