Vestia sett skilyrði um yfirtökuna á Húsasmiðjunni

Fjallað er um málið á vefsíðu Samkeppniseftirlisins. Þar segir að Vestia og Landsbankinn hafa fallist á að hlíta þeim skilyrðum sem sett eru fram í ákvörðuninni, með undirritun sáttar. Við vinnslu málsins hefur einnig verið höfð hliðsjón af kvörtunum og ábendingum sem Samkeppniseftirlitinu hafa borist.

Helstu skilyrði eru eftirfarandi:

Selja skal Húsasmiðjuna innan tiltekins tíma. Um sölufrestinn ríkir trúnaður, enda geta slíkir tímafrestir, ef opinberir væru, haft óeðlileg áhrif á söluferli og söluverð.

Tryggja skal að Húsasmiðjan starfi sem sjálfstæður keppinautur á markaði. Þannig er eignarhaldið á Húsasmiðjunni í höndum eignarhaldsfélags sem staðsett skal utan bankans, auk þess sem sett eru skilyrði um stjórnarsetu í annars vegar eignarhaldsfélaginu og hins vegar Húsasmiðjunni.

Setja skal Húsasmiðjunni eðlilegar arðsemiskröfur. Þetta er mikilvægt til þess að vinna gegn því að bankinn sjái sér hag í því að auka virði Húsasmiðjunnar með því að fjármagna undirboð eða auka markaðssókn og stækka þar með markaðshlutdeild hennar. Þessum skilyrðum er einnig ætlað að takmarka hættu á að stjórnendur og starfsmenn hins yfirtekna fyrirtækis líti á eignarhald bankans sem vernd gegn hvers konar áföllum (e. moral hazard).

Bankanum er óheimilt að hlutast til um viðskipti milli Húsasmiðjunnar og annarra fyrirtækja sem bankinn á hluti í. Þannig er spornað gegn því að Húsasmiðjan og önnur fyrirtæki tengd bankanum beini viðskiptum sínum hvert til annars, án þess að eðlilegar forsendur um viðskiptakjör liggi til grundvallar.

Bankanum er óheimilt að hlutast til um viðskipti milli Húsasmiðjunnar og viðskiptavina bankans. Jafnframt skal tryggja að sömu aðilar á vegum bankans séu ekki viðskiptastjórar annars vegar Húsasmiðjunnar og hins vegar viðskiptavina eða keppinauta hennar. Þá skal tryggja að viðkvæmar upplýsingar berist ekki á milli þessara fyrirtækja.

Birta skal ársuppgjör og hálfsársuppgjör Húsasmiðjunnar opinberlega samkvæmt nánari fyrirmælum ákvörðunarinnar. Jafnframt skal birta margvíslegar upplýsingar um starfsemi eignarhaldsfélaga og Húsasmiðjunnar, auk upplýsinga um framkvæmd skilyrðanna.

Tryggja skal ítarlegt og viðvarandi eftirlit innan bankanna, til viðbótar við eftirlit Samkeppniseftirlitsins.

Brot á framangreindum skilyrðum geta varðað sektum, samkvæmt ákvæðum samkeppnislaga.