Stjórnarformaður OR: Fullyrðingar um milljarða tap rangar

Það mat sem lagt er á viðskipti með hlut Orkuveitu Reykjavíkur í HS Orku í árshlutauppgjöri OR er í samræmi við alþjóðlega reikningsskilastaðla. Fullyrðingar um margra milljarða króna væntanlegt tap OR af viðskiptunum eru rangar. Þetta kemur fram í fréttatilkynningu frá Guðlaugi G. Sverrissyni, stjórnarformanni OR.

Sigrún Elsa Smáradóttir, borgarfulltrúi Samfylkingarinnar og fulltrúi flokksins í stjórn OR, sagði í gær meirihlutann í Reykjavík hafa farið með rangt mál varðandi virði tilboðs Magma í hlut borgarinnar í HS Orku. Samkvæmt árshlutareikningi OR stefni bókfært tap vegna viðskipta með bréf í HS Orku í 4 milljarða.

Guðlaugur segir að í matinu sem hafi verið staðfest af óháðum endurskoðendum sé að finna varúðarniðurfærslu, 962 milljónir króna.

„Fullyrðingar um margra milljarða króna væntanlegt tap OR af viðskiptunum eru rangar. Þær eru byggðar á þeim forsendum að um vanefndir samninga verði að ræða og að hlutabréf í HS Orku, sem eru veð OR fyrir greiðslu, séu í raun talsvert minna virði en í viðskiptum OR og Magma, sem var 6,31," segir Guðlaugur.

Stjórnarformaðurinn segir að í árshlutauppgjöri OR, sem birt var í dag, séu viðskiptin metin með eðlilegri varúðarfærslu í ljósi þess að enn séu ekki allir fyrirvarar viðskiptanna uppfylltir.

„Verði öllum fyrirvörum fullnægt og samningar gangi eftir, mun verðmat sölu OR á hlut sínum í HS Orku einnig ráðast af endanlegu uppgjöri í viðskiptum OR og Hafnarfjarðarbæjar og af því hvert verðmæti HS Orku verður metið á hverjum tíma," segir Guðlaugur.