Erlendar eignir Seðlabankans jukust og skuldir minnkuðu

Erlendar eignir Seðlabanka Íslands námu 506 milljörðum kr. í lok október samanborið við 489 milljarða kr. í lok september 2009. Erlendar skuldir Seðlabanka Íslands voru 260 milljarða kr. í lok október en voru 274 milljarðar kr. í lok sept. 2009.

Þetta kemur fram í hagtölum Seðlabankans. Þar segir að skuld við Alþjóðagjaldeyrissjóðinn (AGS) eykst um 22 milljarða kr. á milli september og október 2009 og er skýringin sú að þann 28. október samþykkti Framkvæmdastjórn AGS fyrstu endurskoðun efnahagsáætlunar íslenskra stjórnvalda. Tilkynningu um það má finna á heimasíðu Seðlabanka Íslands.

Áður eða þann 19. nóvember í fyrra hafði AGS samþykkt að veita Íslendingum lán, fyrsti hluti af því kom til greiðslu í nóvember 2008. Rétt er að taka fram að tölur fyrir ágúst 2009 voru leiðréttar vegna breytinga á sérstökum dráttarréttindum hjá AGS.

Í mars 2009 var gerð sú breyting að telja með eign erlendra aðila á innstæðubréfum og viðskiptaskuld í krónum við erlend greiðslumiðlunarfyrirtæki. Sú breyting nær aftur til september 2008. Jafnframt var gerð sú breyting í mars 2009 að staða og hreyfingar eru nú reiknaðar á miðgengi í stað kaupgengis og nær sú breyting einnig aftur til september 2008.