Brúttóhagnaður Bakkavarar 9 milljarðar á 3. ársfjórðungi

Hreinn hagnaður nam 838 milljónum kr. á fyrstu níu mánuðum ársins, samanborið við tap að fjárhæð 11,2 milljarðar kr. á sama tímabili í fyrra og er því um verulegur viðsnúningur að ræða sem nemur 12 milljörðum króna

Þetta kemur fram í tilkynningu um uppgjör félagsins fyrir þriðja ársfjórðung. Þar segir að áframhaldandi aukning sé í sölu á ferskum tilbúnum matvælum félagsins í Bretlandi og nemur hún 7% í ársfjórðungnum. Aukninguna má einkum rekja til aukinnar sölu í flokki tilbúinna rétta

Handbært fé frá rekstri fyrir skatta, vexti og einskiptiskostnað vegna hagræðingaraðgerða nánast tvöfaldast á þriðja ársfjórðungi miðað við sama tímabil árið 2008, eykst um 86% og nemur 13,3 milljörðum kr.

„Uppgjör þriðja ársfjórðungs sýnir verulega bættan rekstrarárangur félagsins. EBITDA hagnaður jókst um 45% og við erum á góðri leið með að ná EBITDA markmiði okkar fyrir árið í heild. Sjóðstreymi hefur áfram styrkst verulega sem helst má rekja til bættrar afkomu og betri stýringar veltufjármuna. Aukin sala félagsins og meiri hagkvæmni í rekstri hafa skilað þessum árangri sem hefur náðst þrátt fyrir krefjandi rekstrarumhverfi, m.a. vegna aukins kostnaðar við markaðsstarf og áframhaldandi verðhækkana á hráefni," segir Ágúst Guðmundsson, forstjóri Bakkavarar í tilkynningunni.

„Í Bretlandi hefur sala félagsins á ferskum tilbúnum matvælum haldið áfram að aukast og til dæmis jókst sala á tilbúnum réttum, einum af lykilvöruflokkum félagsins, um 13% á þriðja ársfjórðungi. Er þetta til marks um sterka stöðu félagsins í lykilvöruflokkum sínum.

Ennfremur höfum við náð mikilvægum áfanga í samningaviðræðum við lánveitendur um endurfjármögnun móðurfélagsins. Við höfum átt í viðræðum við innlenda lánveitendur sem hafa yfir um 70% af skuldum móðurfélagsins að ráða og hafa þeir lýst yfir vilja til að framlengja gjalddaga skuldabréfaflokka og annarra lána félagsins til ársins 2014 en enn er unnið að útfærslu á kjörum og

skilmálum samkomulagsins. Við gerum ráð fyrir að niðurstaða verði tilkynnt innan skamms. Fyrr á þessu ári var gengið var frá endurfjármögnun rekstrarfélaga samstæðunnar fram í mars 2012.

Við gerum ráð fyrir að viðskiptaumhverfið haldi áfram að vera krefjandi næstu misseri. Þrátt fyrir það erum við fullviss um að þær aðgerðir sem félagið hefur ráðist í, ásamt þeim vaxtarmöguleikum sem reksturinn býr yfir, muni skila enn betri afkomu á komandi árum."