Kaupþing mun ræða við Guðmund Franklín um Haga

Bankastjóri Nýja Kaupþings segir að bankinn muni ræða við Guðmund Franklín Jónsson vegna sölu Haga ef eftir því verður óskað þótt fyrsti kostur sé að núverandi eigendur komi inn með nýtt fé. Guðmundur á sjálfur litríkan feril að baki í viðskiptalífinu.

Rúmlega 3300 manns hafa lýst yfir áhuga á því að fjárfesta í Högum, samkvæmt vefsíðunni thjodarhagur.is, eða um eitt prósent þjóðarinnar. Finnur Sveinbjörnsson, bankastjóri Nýja Kaupþings, sagði í samtali við fréttastofu í dag að bankinn myndi ræða um Haga við Guðmund Franklín Jónsson og aðra áhugasama fjárfesta, ef óskað yrði eftir því. Það væri hins vegar í samræmi við verklagsreglur bankans að gefa núverandi eigendum Haga kost á því á að leggja fram nýtt fé.

Guðmundur Franklín sagði í samtali við fréttastofu ekkert væri hæft í þeim sögusögnum að framsóknarmennirnir Finnur Ingólfsson og Þórólfur Gíslason stæðu að baki hópnum. Hann neitaði því jafnframt að Sigurður Gísli Pálmason og Jón Pálmason hefðu lagt hópnum til fjármagn, en þeir eru synir Pálma Jónssonar, stofnanda Hagkaupa.

Guðmundur Franklín, sem er 46 ára og viðskiptafræðingur að mennt, starfaði í 13 ár sem verðbréfamiðlari á Wall Street. Guðmundur var lengi eini íslenski verðbréfamiðlarinn utan Íslands og var duglegur að finna fjárfestingarverkefni fyrir íslensku lífeyrissjóðina.

Guðmundur var stjórnarformaður Burnham International, en það varð gjaldþrota árið 2002 og skildi eftir sig sviðna jörð. Kröfur í þrotabúið námu á fjórða hundrað milljónir króna. Meða þeirra sem áttu háar kröfur í búið voru íslenskir lífeyrissjóðir. Í tengslum við gjaldþrotið var m.a krafist kyrrsetningar á húseign Guðmundar vegna ógreiddra skuldabréfa að fjárhæð 80 milljóna króna.

Guðmundur hefur síðustu sjö ár rekið Bellagio hótelið í Prag í Tékklandi, og hefur sagt fjárhagsstöðu sína ágæta í viðtölum. Þess má geta að Guðmundur er meðal umsækjenda um stöðu forstjóra Bankasýslu ríkisins, en umsóknarfrestur rann út hinn 2. nóvember síðastliðinn.