Íslenskar poppstjörnur prófa Formúlu 1

Tvær af skærustu söngstjörnum landsins spretta úr spori í Formúlu 1 ökuhermum í þættinum Rásmarkið á Stöð 2 Sport í kvöld. Það eru Stefán Hilmarsson og Eyjólfur Kristjánsson sem mun reyna með sér á Barcelona brautinni, en keppt verður á henni um helgina.

Þeim til fulltingis verður Kristján Einar Kristjánsson sem keppti í kappakstri á Valencia brautinni á Spáni um síðustu helgi. Hann keppir í Formúlu 3 á ný og mun leiðbeina poppurunum tveimur áður en þeir takast á við ökuhermanna.

Í þættinum verður rætt um frægð og frama ýmissa Formúlu 1 stjarna og hvernig menn tlakast á við vinsældir. Fjallað verður sérstakega um Jenson Button og Sebastian Vettel sem eru einu ökumennirnir sem hafa unnið mót á þessu ári.

Stefán og Eyjólfur hafa báðir fylgst með Formúlu 1 gegnum tíðina og munu láta ljós sitt skína á nýjum vettvangi með kappakstrinum í kvöld. Þátturinn á Stöð 2 Sport hefst klukkan 20.30.