Magma ætlar að auka orkuvinnslu HS Orku um 230 MW

Magma Energy er með áform uppi um að auka orkuvinnslu HS Orku um 230 MW fram að árinu 2015. Þetta kemur fram í tilkynningu frá félaginu til kauphallarinnar í Kanda þar sem greint var frá því að búið sé að ganga frá kaupum Magma á 32,32% hlut í HS Orku.

Eins og greint var frá í gærdag hefur forstjóri Magma Energy, Ross Beaty, tekið sæti í stjórn HS Orku ásamt öðrum fulltrúa félagsins, Lyle Braaten. Fyrsti stjórnarfundurinn með þátttöku þeirra var haldinn í gær.

Ross Beaty segir í fyrrgreindri tilkynningu að hann sé ánægður með að þessum kaupum sé lokið. Magma hefur nú formlega eignast rétt rúm 40% hlut í HS orku, en stærsti hluthafinn er Geysir Green Energy.

Beaty segir að með kaupunum hafi orkuvinnsla Magma aukist um 86 MW. Auk þess hafi möguleg orkuöflun félagsins aukist um 600 MW.