Ekkert aðhafst vegna kvörtunar Medine gegn Teymi

Forsaga málsins er í stuttu máli sú að s.l. sumar gerði Medine fyrrgreint tilboð í Tal og átti fund með forsvarsmönnum NBI bankans um málið en NBI fer með um 60% hlut í Teymi. Tilboðinu var ekki svarað innan tilskilins frests og forráðamönnum Medine var síðan tjáð að hluturinn í Tali væri ekki til sölu.

Medine taldi að Teymi væri að nýta sér fjárhagslegan styrk sinn til að halda aftur af samkeppni með því að draga það að aðskilja Teymi og Tal. Nyti félagið fulltingis NBI og Vestia sem staðið hafi fyrir því að fella niðuir skuldir þess.

Teymi segir aftur á móti að félagið hafi ekki treyst sér til þess að selja hluti sína í Tali fyrr en fjárhagsstaða þess væri ljós. Vísaði Teymi síðan í sátt sem félagið gerði við Samkeppniseftirlitið fyrr í ár um aðskilnað Teymis og Tals.

Í ákvörðun Samkeppniseftirlitsisn segir: „Í kvörtun er vísað til orða stjórnarformanns Teymis í tölvuskeyti þann 31. ágúst 2009 þar sem sagði að eignarhlutur Teymis í Tali væri ekki til sölu á þeim tímapunkti. Telur Medine að Teymi hafi með þessu brotið gegn skilyrðum nefndrar ákvörðunar. Vísað var til þess af hálfu Teymis að formlegt söluferli væri ekki hafið og því borið við að það sé í samræmi við almenn viðmið við sölu eigna hjá NBI og Vestia.

Medine vísar til þess að það geti ekki samrýmst markmiði samkeppnislaga að Teymi geti, með fulltingi NBI eða Vestia, nýtt sér fjárhagslegan styrk sinn til þess að halda aftur af samkeppni á fjarskiptamarkaði m.a. með ónauðsynlegum drætti á aðskilnaði Teymis og Tals. Félagið telur að það séu engin sérstök efni til þess að tefja sölutilraunir vegna fjárhagslegrar endurskipulagningar Tals. Telur Medine að helsti vandi Tals virðist miklu frekar vera tengdur hagsmunum stærsta eiganda félagsins en fjárhagslegri stöðu þess.

Teymi mótmælir framangreindu og telur sig hafa heimild á þessum tímapunkti til að neita Medine um sölu. Vísar félagið í sátt sem gerð var við Samkeppniseftirlitið. Þá vísar félagið til þess að við gerð hennar hafi verið ljóst að Teymi treysti sér ekki til þess að selja hluti sína í Tali fyrr en fjárhagsstaða félagsins væri ljós. Þá tekur Teymi fram varðandi nýlegt mat NBI á verðmæti hluta í Tali að félagið hafi ekki upplýsingar um og geti ekki tekið afstöðu til forsendna eða niðurstöðu þess.

Samkeppniseftirlitið álítur að Teymi hafi ekki haft heimild til þess að synja tilboði Medine á þeim grundvelli einum að eignarhlutur Teymis væri ekki til sölu á þeim tímapunkti. Ljóst er skv. ákvörðun Samkeppniseftirlitsins... að hlutur Teymis í Tali var til sölu þegar tilboð barst, sbr. þá meginreglu ákvörðunarinnar að sölutilraunir skuli hefjast sem fyrst. Aftur á móti verður að virða svigrúm Teymis til þessa að afla frekari fjárhagslegra upplýsinga og koma eðlilegum aðgerðum í framkvæmd til að bæta rekstur Tals.

Að mati Samkeppniseftirlitsins hafa ekki verið færð fram sjónarmið af hálfu Medine sem hnekki því að Teymi hafi verið heimilt að láta sölutilraunir bíða þar til fullnægjandi upplýsingar liggi fyrir, að teknu tilliti til þeirra fresta sem eru í ákvörðun Samkeppniseftirlitsins... Þá verður ekki véfengd staðhæfing Teymis um að félagið hafi ekki upplýsingar um verðmat NBI á hlutum í Tali. Samkvæmt þeim upplýsingum sem Samkeppniseftirlitið hefur undir höndum hefur farið fram vinna við að afla nánari fjárhagslegra upplýsinga um rekstur Tals, m.a. að frumkvæði nýrra óháðra stjórnarmanna í Tali."