Berghildur Erla verður upplýsingafulltrúi Kaupþings

Berghildur Erla Bernharðsdóttir hefur verið ráðin upplýsingafulltrúi Nýja Kaupþings. Berghildur lauk M.A. prófi í blaða- og fréttamennsku frá Háskóla Íslands árið 2008, prófi í hagnýtri fjölmiðlun 1995 og B.A. prófi í félags- og viðskiptafræði 1994 frá sama skóla.

Í tilkynningu frá Kaupþingi segir að Berghildur hafi víðtæka reynslu af fjölmiðlum en hún hafi frá árinu 2000 unnið hjá RÚV við fréttir og dagskrárgerð. Hún hafi einnig starfað sem ritstjóri hjá Fróða og Uppeldi. Þá hafi hún haldið fyrirlestra á vegum Capacent og Þekkingarmiðlunar. Berghildur starfaði jafnframt um árabil í Íslandsbanka, forvera Glitnis.