Launakostnaður jókst í iðnaði en lækkaði hjá öðrum

Þetta kemur fram á vefsíðu Hagstofunnar. Þar segir að heildarlaunakostnaður án óreglulegra greiðslna jókst um 4,3% í iðnaði frá fyrri ársfjórðungi. Hins vegar dróst hann saman um 2,4% í atvinnugreininni í samgöngum og flutningum, 1,5% í verslun og ýmissi viðgerðarþjónustu og 1,1% í byggingarstarfsemi og mannvirkjagerð.

Í heildarlaunakostnaði án óreglulegra greiðslna er ekki tekið tillit til greiðslna sem ekki eru gerðar upp á hverju útborgunartímabili.

Árshækkun heildarlaunakostnaðar á greidda stund frá 3. ársfjórðungi 2008 var á bilinu 1,8% til 4,4%. Mest var hækkunin í iðnaði en minnst í samgöngum og flutningum.

Vísitala launakostnaðar er kostnaðarvísitala sem sýnir breytingar á launakostnaði á greidda stund og er ekki leiðrétt fyrir breytingum í samsetningu vinnuafls og vinnustunda. Niðurstöður eru birtar með fyrirvara um breytingar. Vísitala launakostnaðar er gefin út ársfjórðungslega og reiknuð samkvæmt reglugerð Evrópuþingsins og Ráðsins.