Aðgerðir Sérstaks saksóknara vekja athygli erlendis

Síðustu aðgerðir Sérstaks saksóknara, Ólafs Haukssonar, hafa vakið athygli erlendis bæði austan hafs og vestan. Fjallað er um ellefu húsleitir hjá Milestone og Sjóvá í gærdag í nokkrum vefmiðlum í dag.

Norræna fréttastofan NTB sendi frá sér frétt um málið þar sem sagt er að rannsakendur hafi verið í aðgerðum á heimilum fyrrum eigenda Milestone og fyrrum forstjóra Sjóvá. Markmiðið sé að finna út hvaða hlutverki þeir hafi gengt í íslenska efnahagshruninu í fyrra.

Þessa frétt tekur vefsíðan e24.no í Noregi upp undir fyrirsögninni „Razzia på Island". Vefsíða Dagens Industri í Svíþjóð byggir sína frétt einnig á NTB.

Öllu nákvæmari frásögn af viðburðum gærdagsins er að finna í stórblaðinu Los Angeles Times sem og í viðskiptablaðsinu The Wall Street Journal.