Breska stjórnin getur ekki farið íslensku leiðina

Breska ríkið getur ekki farið íslensku leiðina og þjóðnýtt Royal Bank of Scotland að fullu að mati viðskiptaritstjóra breska blaðsins Daily Telegraph.

Hann segir vanda á höndum því breska stjórnin hafi ekki efni á að láta hann fara í þrot og heldur ekki efni á að taka hann allan yfir.

Ambrose Evans-Pritchard er viðskiptaritstjóri breska blaðsins Daily Telegraph og hefur kynnt sér ástandið á Íslandi fyrir og eftir hrun. Hann var í viðtali á markaðnum í júlí síðastliðnum þar sem hann sagði íslenskt efnahagslíf í kreppu. Íslendingar hefðu farið of geyst, verið of öruggir og alltof bjartsýnir. Hann sagði að Bretar yrðu einnig illa settir.

Í grein í gær fjallar hann um vanda Royal Bank of Scotland. Breska ríkið tók yfir fimmtíu og átta prósenta hlut í bankanum í fyrri bankabjörgun. Fyrr í vikunni tilkynntu stjórnendur að tap bankans í fyrra væri met í breskri fjármálasögu. Nærri tuttugu og átta milljarðar punda hefðu tapast, jafnvirði um fimm þúsund milljarða króna - nærri því tíföld útgjöld íslenska ríkisins í ár.

Þá tilkynnti breska ríkið að hlutur þess í bankanum yrði aukin upp í ríflega sjötíu prósent og það hluti að nýjustu bankabjörgun Breta.

Alþjóðagjaldeyrissjóðurinn er ekki viss um að hún dugi og spáir því að þjóðnýta þurfi einhverja breska banka að fullu.

Standard & Poors hefur ekki lækkað lánshæfismat breska ríkisins niður fyrir þrefallt A en sérfræðingar telja margir að það geti gerst. Það yrði áfall enda lækkaði lánshæfismatið ekki svo mikið þó Alþjóðagjaldeyrisjóðurinn hafi verið kallaður til að bjarga breskum fjárhag 1976.

Evans-Pritchard ber ástandið í Bretlandi saman við atburðina á Íslandi í haust og segir stöðuna um margt sambærilega.

Gjaldeyrisforði Breta er undir sextíu og einum milljarði bandaríkjadala sem er minna en í Malasíu og Taílandi. Erlendar skuldir breskra banka eru 4,4 trilljónir dollara eða tvöföld verg landsframleiðsla Breta. Pundið hefur hrunið um tíu sent gagnvart dollara á tveimur dögum.

Evans-Pritchard segir að breska ríkið þurfi hugsanlega að taka yfir Royal Bank of Scotland og fleiri banka að fullu en hafi vart efni á að taka yfir erlendar skuldir þeirra.

Það geti ekki gengið frá þeim líkt og hjá íslenskum stjórnvöldum því þar með færi trúverðugleiki breska viðskiptakerfisins til fjandans og alvarleg og langvarandi kreppa myndi skella á.