Erlend greiðslukortavelta jókst um tæp 62% milli ára

Greiðslukortavelta Íslendinga erlendis dróst saman um 24,8% en erlend greiðslukortavelta hérlendis jókst um 61,8% í janúar-september 2009 miðað við sömu mánuði 2008.

Þetta kemur fram í hagvísum Hagstofunnar. Þar segir að kreditkortavelta heimila dróst saman um 10,9% í janúar-september í ár miðað við sömu mánuði í fyrra. Debetkortavelta jókst hins vegar um 6,0% á sama tíma. Samtals dróst innlend greiðslukortavelta heimila í janúar-september 2009 saman um 2,9%.

Vísitala neysluverðs án húsnæðis hækkaði um 17,5% (miðað við meðaltal vísitölunnar í janúar-september), sem þýðir 17,4% raunlækkun á innlendri greiðslukortaveltu.

Nýskráningar bíla í janúar-október voru 2.595 sem er 78,6% fækkun frá janúar- október í fyrra. Síðastliðna 12 mánuði, til loka október, voru nýskráningar bíla 2.795 en það er 81,9% fækkun frá fyrra tólf mánaða tímabili.