Havilland þjónustar Tortólufélag Gunnlaugs Sigmundssonar

Þetta segir Sigrún Davíðsdóttir í pistli sem hún flutti í Speglinum á RUV í gærdag og hefur verið birtur á heimasíðu RUV. Upplýsingarnar hefur hún úr Lögbirtingarblaði Lúxemborgar. Havilland er bankinn sem keypti dótturfélag Kaupþings í Lúxemborg en við þau kaup kom fram hjá hinum nýju eigendum, Rowland-fjölskyldunni bresku, að fyrirtækjamenning Kaupþings yrði lögð af og íhaldssöm bankastarfsemi tæki við.

Sigrún segir að Havilland hafi þó áhuga á viðskiptum við Íslendinga. Spegillinn veit til að haft hafi verið samband við ýmsa íslenska viðskiptavini Kaupþings í Lúxemborg til að tryggja viðskipti þeirra. Spegillinn hefur áður rakið að Kaupþing var öflugt í að stofna eignarhaldsfélög fyrir efnaða Íslendinga þegar frá 1999 - og á næstu árum voru stofnuð um 150 slík félög.

„Þarna eru aðeins meðtalin félög einstaklinga með eitt félag, ekki félagaklasar tengdir stórtækustu umsvifamönnunum. Eins og áður hefur komið fram voru þessi félög sannkallaðar fjallabaksleiðir í skattkerfinu - alveg undir viðskiptavinum komið hvort þeir gáfu félögin upp eða ekki," segir Sigrún.

„En hvernig hefur þessum félögum einstaklinga vegnað eftir hrunið? Gjaldeyrishöftin breyttu litlu nema að eigendur félaganna gátu auðvitað ekki lengur flutt fé úr landi. Spegillinn hefur kannað lauslega hvernig þessum íslensku félögum einstaklinga hefur reitt af. Mörg hafa verið leyst upp undanfarin ár - en í haust hefur Havilland flutt til sín 24 félög í eigu Íslendinga sem áður voru hjá Kaupþingi. Havilland hefur að öllum líkindum keypt Tortólufélög sem Kaupþing átti og notaði til að setja upp félög því þessi félög koma enn við sögu."

Ennfremur kemur fram í máli Sigrúnar að miðað við hvernig félagið GSSG Holding er sett upp má álykta að Gunnlaugur eigi í raun þetta félag enn. Gunnlaugur er faðir Sigmundar Davíðs Gunnlaugssonar formanns Framsóknarflokksins.



„Í febrúar 2006 urðu Tortólufélögin stjórnendur í stað Gunnlaugs. GSSG Holding hefur ekki verið leyst upp og ekki tilkynnt um nýjan eiganda svo ætla má að Gunnlaugur Sigmundsson sé enn eigandi þess. Nú er það Havilland bankinn sem sér um GSSG Holding," segir Sigrún.

„Skráning Havilland á íslensku félögunum sýnir að einhverjir Íslendingar eru enn ekki orðnir afhuga aflandsþjónustunni sem gefst í Lúxemborg."