Vilhjálmur: Ekki verður fallist á neinar skattahækkanir 2011

Þetta kemur fram í grein sem Vilhjálmur hefur skrifað og birt er á vefsíðu Samtaka atvinnulífsins. Þar fjallar hann ítarlega um skattamál atvinnulífsins og afstöðu SA til fyrirhugaðra skattahækkana og skattabreytinga ríkisstjórnarinnar. Hann

„Ríkisstjórnin hefur nú kynnt útfærð áform sín um skattahækkanir vegna fjárlagagerðar fyrir árið 2010. Töluverðar breytingar hafa orðið á þessum áformum frá því sem kynnt var í fjárlagafrumvarpinu sem lagt var fram í októberbyrjun. Á undanförnum vikum hafa viðræður verið í gangi milli Samtaka atvinnulífsins og stjórnvalda um það sem snýr að atvinnulífinu í þessum skattahækkunum," segir Vilhjálmur.

„Ekki tókst að ljúka þessum viðræðum þegar kom að framlengingu kjarasamninga í lok október og framgangur stöðugleikasáttmálans frá því 25. júní var metinn. Ákveðið var að láta reyna áfram á hvort hægt væri að ná ásættanlegri niðurstöðu. Nú þegar hún liggur fyrir er ljóst að komið hefur verið til móts við óskir Samtaka atvinnulífsins en þó eru mikilvæg mál sem enn er ekki samstaða um."

Í greininni fjallar Vilhjálmur m.a. um mikilvægi fjárfestinga, hækkun atvinnutryggingagjalds, atlögu að rekstrarskilyrðum sjávarútvegsins og sérkennilega umhverfisstefnu ríkisstjórnarinnar auk þess að benda á galla í fyrirhuguðum skattkerfisbreytingum.

Þá undirstrikar Vilhjálmur að Samtök atvinnulífsins hafi leitast við að sýna fulla ábyrgð í umfjöllun sinni um skattamál og í viðræðum við ríkisstjórnina. Hallarekstur ríkissjóðs af núverandi stærðargráðu sé ekki kostur og þess vegna verði að taka á málinu.

„Meginatriði er að tryggja fjárfestingar í atvinnulífinu og hagvöxt á næsta ári þannig að skattahækkanir lendi ekki á minnkandi skattstofnum. Þá fer illa. Samtökin hafa fyrst og fremst verið að reyna að draga úr skaðsemi óhjákvæmilegra skattahækkana fyrir atvinnulífið eins og mögulegt hefur verið þannig að fjárfestingar og uppbygging í atvinnulífinu haldi áfram. Ekki er öllum verkum lokið. Ennþá standa mál útaf borðinu. Sjávarútvegurinn verður að fá starfsfrið, annars getur hann ekki tekið þátt í uppbyggingunni og virðisaukaskattinn verður að laga," segir Vilhjálmur Egilsson.