Magnús gjaldþrota - flóttatilraunin misheppnaðist

Bú auðmannsins Magnúsar Þorsteinssonar verður tekið til gjaldþrotaskipta en úrskurður þess efnis féll í héraðsdómi Norðurlands eystra fyrr í dag. Straumur-Burðarás fjárfestingarbanki krafðist þess að Magnús yrði tekinn til gjaldþrotaskipta en Magnús sagðist geta staðið undir skuldum sínum við bankann. Magnús flutti einnig lögheimili sitt til Rússlands frá Akureyri rétt áður en krafan var tekin fyrir.

Ástæðan fyrir gjaldþrotakröfunni er sú að fjárfestingafélagið BOM ehf tók tæplega tólfhundruð milljón króna lán til þess að kaupa hlut í Icelandic Group. Lánið var veitt árið 2005. Upprunalegir lántakendur voru þeir Baldur Guðnason og Steingrímur H. Pétursson, eigendur Sjafnar.

Það var svo árið 2007 sem Magnús keypti BOM og skrifaði undir sjálfskuldarábyrg upp á 930 milljónir króna

Magnús sagðist fyrir dómi telja að hann væri allt að einu fær um að standa full skil á skuldbindinum sínum og hann væri ekki í persónulegum vanskilum.

Í úrskurðinum segir hinsvegar að ekkert bendi til þess að Magnús geti staðið skil á skuldbindingum sínum.

Í úrskurðinum kemur einnig fram að þegar krafan um gjaldþrotaskipti barst dómnum átti Magnús lögheimili á Akureyri og því beri að ljúka meðferð kröfunnar fyrir dómi þrátt fyrir að hann eigi nú lögheimili í Rússlandi.