Þór Sigfússon formaður SA fer í frí

Vefsíða Samtaka atvinnulífsins segir að Þór Sigfússon, formaður SA, hafi ákveðið að taka sér leyfi frá störfum sem formaður Samtaka atvinnulífsins um óákveðinn tíma, frá og með 9. júlí, þar til mál skýrast varðandi stöðu hans í rannsókn sérstaks saksóknara á fjárfestingarstarfsemi Sjóvar.

Þetta kemur fram í bréfi Þórs til félagsmanna SA en greint var frá rannsókninni á vef SA. Þór segist telja að störf hans hjá Sjóvá hafi í einu öllu verið í samræmi við lög enda hafi hann unnið af metnaði og bestu samvisku.

Honum sé umhugað um að starfsemi SA gangi eins vel og kostur er og vilji á engan hátt að samtökin verði fyrir skaða vegna fyrrgreindrar rannsóknar sem sé þeim algjörlega óviðkomandi.

Bréfið er svohljóðandi:

„Sérstakur saksóknari hefur nú hafið rannsókn á fjárfestingastarfsemi Sjóvár þar sem ég var forstjóri þangað til undir lok maí sl. Ég hef lýst því yfir í fjölmiðlum að ég telji að störf mín fyrir Sjóvá hafi í einu og öllu verið í samræmi við lög enda vann ég af metnaði og bestu samvisku fyrir fyrirtækið.

Mér er umhugað um að starfsemi Samtaka atvinnulífsins gangi eins vel og kostur er og vil á engan hátt að samtökin verði fyrir skaða vegna þessarar rannsóknar sem er þeim algjörlega óviðkomandi.

Því hef ég ákveðið að taka mér leyfi frá störfum frá 9. júlí sem formaður Samtaka atvinnulífsins um óákveðinn tíma þangað til mál skýrast varðandi stöðu mína í rannsókns sérstaks saksóknara."

Þór Sigfússon, formaður Samtaka atvinnulífsins