Eigið fé OR gæti þurrkast út vegna stöðutöku með krónunni

Um 30% af erlendum skuldum OR eru í svissneskum frönkum og japönskum jenum eða um 60 milljarðar kr. Svo miklar skuldir í þessum lágvaxtamyntum verður að lýsa ákveðinni áhættutöku hjá fyrirtækinu.

Þetta kemur fram í Markaðspunktum greiningar Arion banka þar sem fjallar er um síðasta uppgjör Orkuveitunnar. Þar segir ennfremur að um 40% af erlendum skuldum Orkuveitunnar séu í evrum á meðan erlendar tekjur fyrirtækisins (raforkusölusamningar tengdir álverði) eru í dollurum. En í því samhengi er rétt að benda á gengisþróun evru/dollars hefur verið Orkuveitunni afar óhagstæð síðustu misseri.

Orkuveita Reykjavíkur birti 9 mánaða uppgjör sitt þann 27. nóvember síðastliðinn sem varpar ljósi á þrönga fjárhagsstöðu fyrirtækisins eftir að kreppan skall á. Skuldir OR hafa tvöfaldast við gengishrun krónunnar.

Um 90% af vaxtaberandi skuldum OR eru í erlendri mynt á sama tíma og um 19% tekna fyrirtækisins eru í erlendum gjaldmiðli. Gengisfall krónunnar hefur bæði rýrt eiginfjárstöðu og skert sjóðstreymi fyrirtækisins. Á móti kemur að vaxtalækkanir ytra vegna fjármálakrísunnar hafa minnkað vaxtakostnað OR í erlendri mynt og það hefur komið til góða. Hins vegar er lánshæfi OR nú í ruslflokki sem mun gera endurfjármögnun lána og töku nýrra bæði dýrari og erfiðari. Einnig er hætt við að versnandi fjárhagsstaða fyrirtækisins leiði til uppsagnar á núverandi lánasamningum.

Þessi staða hlýtur að sníða OR mjög þröngan stakk á næstu misserum nema nýtt eigið fé verði sett inn í fyrirtækið eða krónan styrkist verulega. Hvorugt virðist mjög líklegt til skamms og meðallangs tíma. Að því gefnu þarfnast það skýringa við hvernig félagið geti eitt og óstutt komið metnaðarfullum áætlunum um nýfjárfestingar og áframhaldandi vöxt í framkvæmd með aukinni skuldsetningu.

Aukinheldur er ómögulegt að skilja hugmyndir um arðgreiðslu frá fyrirtækinu til eigenda í ljósi stöðu þess. Ekki verður annað séð en að OR muni eiga fullt í fangi við endurfjármögnun útistandandi lána, hvað þá ef kemur til aukinnar lántöku. Hærra álverð mun fyrirsjáanlega auka tekjur OR að einhverju marki en þegar litið er aðeins fram í tímann hlýtur slæm fjárhagsstaða fyrirtækisins að varpast yfir í orkuverð til almennra notenda (einstaklinga, fyrirtækja o.s.frv.) á höfuðborgarsvæðinu- þar sem helsti orkumarkaður fyrirtækisins er.

Staðan er einfaldlega sú að fyrirtækið þarf aukna framlegð til þess að geta staðið straum af hærri fjármagnskostnaði og hárri skuldsetningu, að því er segir í Markaðspunktunum.