Rannsókn á meintri markaðsmisnotkun Imons langt komin

Rannsókn sérstaks sakskóknara á meintri markaðsmisnotkun Imons, félags í eigu Magnúsar Ármanns, er einna lengst komin af þeim þrjátíu málum sem eru til meðferðar hjá embættinu.

Imon, félag í eigu Magnúsar Ármanns, keypti rúmlega 4 prósenta hlut í Landsbankanum fyrir tæpa níu milljarða þremur dögum áður en Fjármálaeftirlitið tók bankann yfir. Imon fjármagnaði kaupin að fullu með láni frá Landsbankanum og var eina veðið í hlutabréfunum sjálfum sem urðu verðlaus þegar bankinn var tekinn yfir.

Skömmu eftir fall bankans fór málið inn á borð Fjármálaeftirlitsins. Það var síðan sent til rannsóknar hjá embætti sérstaks saksóknara en grunur leikur á að um markaðsmisnotkun hafi verið að ræða en slíkt getur varðað sex ára fangelsi. Samkvæmt heimildum fréttastofu hefur gagna verið leitað á heimili Magnúsar auk þess sem hann og starfsmenn Landsbankans sem sáu um þessi viðskipti hafa verið yfirheyrðir.

Þá herma heimildir fréttastofu að málið sé einna lengst komið af þeim 30 málum sem eru til rannsóknar hjá embættinu og það sé það alvarlegt að ekki verði komist hjá því að ákæra í því. Málið gæti því orðið það fyrsta sem Björn L. Bergsson, ríkissaksóknari gagnvart embætti sérstaks sakskóknara, fær til ákærumeðferðar.

Ekki náðist í Magnús Ármann í dag.