Arion ætlar að auglýsa eftir bankastjóra - Finnur hættir

Arion banki mun á næstu dögum verða fyrstur stóru viðskiptabankanna til að auglýsa stöðu bankastjóra lausa til umsóknar. Í tilkynningu frá bankanum segir að ráðningarsamningur Finns Sveinbjörnssonar bankastjóra sé tímabundinn og rennur hann út næstkomandi áramót.

Skilanefnd Kaupþings banka og Bankasýsla ríkisins hafa verið meðvituð um þetta í samningaviðræðum undangenginna mánaða. Einnig kemur fram í tilkynningunni að Finnur hafi tilkynnt stjórn Arion banka og skilanefnd Kaupþings að hann muni ekki sækjast eftir starfinu að loknum ráðningartíma hans. Starfið verður því auglýst laust til umsóknar.

„Það er mat stjórnar Arion banka og skilanefndar Kaupþings að með því að hafa þennan háttinn á við ráðningu nýs bankastjóra aukist traust viðskiptavina og kröfuhafa á bankanum og starfsemi hans," segir ennfremur. Finnur segir það hafa verið ljóst frá upphafi að um tímabundið verkefni væri að ræða.

„Á þessu eina ári hefur bankinn lagað sig að nýjum veruleika eftir bankahrunið og tekist á við mörg flókin, erfið og umdeild verkefni. Stutt er síðan nýtt nafn bankans og stefnumótun voru kynnt og í dag fékkst langþráð niðurstaða um framtíðareignarhald bankans. Á þessum tímamótum er eðlilegt að nýr bankastjóri verði ráðinn," segir Finnur Sveinbjörnsson.