Bresk stjórnvöld kynna aðgerðaráætlun á vinnumarkaði

Bresk stjórnvöld hyggjast nota 10 milljarða punda á þessu ári til að efla atvinnulífið í landinu. Þetta kom fram í máli Gordons Brown, forsætisráðherra Bretlands, í viðtali við breska ríkisútvarpið, BBC.

Atvinnuleysi hefur farið vaxandi í Bretlandi undanfarna mánuði í kjölfar lánsfjárkreppunnar. Þrátt fyrir að bresk stjórnvöld hafi notað 37 milljarða punda á síðasta ári til að koma hreyfingu á þarlendan fjármálamarkað hafa bankar enn ekki aukið útlán.

Gordon Brown, forsætisráðherra Bretlands, sagði - í viðtali við breska ríkisútvarpið BBC í gær - mikilvægt að bankar lokuðu ekki frekar á útlán.

Brown kynnti ennfremur þá áætlun breskra stjórnvalda að nota 10 milljarða punda á þessu ári, eða sem nemur um 1.700 milljörðum króna miðað við núverandi gengi - til að skapa eitt hundrað þúsund ný störf í landinu.

Hann sagði þó að árið 2009 yrði erfitt í efnhagslegum skilningi.

Vandi breskra stjórnvalda er mikill um þessar mundir. Í breska blaðinu The Times í gær kom fram að Alister Darling, fjármálaráðherra Bretlands, neyðist nú til að íhuga nýjar aðgerðir til að koma þarlendum fjármálamörkuðum til bjargar. Reiknað er með að ákvörðun liggi fyrir á næstu vikum.