Landsframleiðsla á mann 21% yfir meðaltali ESB-ríkja

Þetta kemur fram í Morgunkorni greiningar Íslandsbanka. Þar segir að Ísland sé þarna í liði með norrænum vinum sínum Danmörk og Svíþjóð, en landsframleiðsla þessara landa á mann er 20% yfir meðaltali ESB ríkjanna. Finnland er 17% yfir meðaltalinu en Noregur er sér á báti með landsframleiðslu á mann sem er 91% yfir meðaltali ESB ríkjanna. Kemur þetta fram í tölum sem hagstofa ESB birti í gær.

Mikil atvinnuþátttaka, lítið atvinnuleysi og langur vinnutími skýrir að vissu marki hversu ofarlega Ísland er í þessum samanburði. Ef samanburðurinn væri gerður á landsframleiðslu á hverja vinnustund myndi Ísland koma verr út.

Ljóst er einnig að fjármálakreppan mun færa landið niður á þessum lista en auk samdráttar í landsframleiðslu hefur gengi krónunnar lækkað umtalsvert og verðbólgan verið langt umfram það sem hún hefur verið í öðrum ESB ríkjum á árinu. Í þessum samanburði á efnahagslegri velmegun þjóða hefur fjármálakreppan því veikt stöðu Íslands talsvert.

Þrátt fyrir fjármálakreppuna er ljóst að íslenska hagkerfið er enn meðal þeirra sem bjóða upp á hvað besta efnahagslega velmegun. Í þessum samanburði ESB ríkjanna sést að mörg lönd sambandsins eru mun verr stödd á þennan mælikvarða.

Þannig er landsframleiðslan metin með ofangreindum hætti 41% af ESB meðaltalinu í Búlgaríu, 57% í Lettlandi og 62% í Litháen. Í Póllandi er hlutfallið 56% en þess má geta að Pólverjar eru stærsti einstaki hópur innflytjenda hér á landi eða ríflega 40%.