Ferrari má ekki verða aðlhlátursefni

Forseti Ferrari predikaði heldur betur yfir sínum mönnum í Formúlu-1 liðinu á krísufundi á Ítalíu í vikunni.

Luca di Montezemolo heitir forsetinn. Ferrari hefur ekki byrjað verr á tímabili í formúlunni síðan 1992, en hvorugur ökuþórinn hefur náð í stig í fyrstu tveimur keppnunum.

Di Montezemolo þrumaði yfir sínum mönnum á fundinum sem stóð yfir í tvö og hálfan tíma.

„Ég vil ekki að við verðum eins og einhver gamanmyndbönd í sjónvarpinu eftir hverja keppni," sagði forsetinn sem bætti þó við að hann hefði fulla trú á sínu liði.

Ferrari hefur unnið átta af síðustu tíu keppnm bílasmiða í Formúlu-1. Tímabilið nú hefur byrjað skelfilega.

Felipe Massa endaði níundi í Malasíu og Kimi Raikkonen lenti þar í 14. sæti. Báðir hættu þeir keppni í fyrsta mótinu í Ástralíu.