Hlutfall erlendra hærra hér en að meðaltali í ESB-löndum

Greining Íslandsbanka fjallar um málið í Morgunkorni sínu. Þar segir að etta hlutfall sé mjög mismunandi á milli ríkja. Þannig er algengara að hlutfallslegur fjöldi erlendra ríkisborgara sé hærra í þeim ríkjum þar sem lífkjör íbúa eru góð sem m.a. má sjá með tölum um landsframleiðslu á mann. Til að mynda í Sviss voru erlendir ríkisborgara ríflega fimmtungur af heildamannfjöldanum árið 2008 en þar í landi var landsframleiðsla á mann um 41% yfir meðaltali ESB ríkja.

Í Búlgaríu, Póllandi og Rómaníu er hlutfall erlendra ríkisborgara af heildarmannfjölda undir 0,5% en í þessum ríkjum eru lífskjör, þá metin með landsframleiðslu á mann, töluvert verri en í öðrum ríkjum Evrópu. Þannig var landsframleiðsla á mann í Búlgaríu um 41% af meðaltali ESB-ríkjanna en þessi hlutföll voru 56% í Póllandi og svo 47% í Rómaníu. Þetta kom fram í tölum sem Evrópusambandið birti nýlega.

Á fyrstu 9 mánuðum þess árs voru aðfluttir erlendir ríkisborgarar 2.793 en brotfluttir 3.538 hér á landi. Þetta er í fyrsta skipti frá árinu 1992 sem brotfluttir erlendir ríkisborgarar eru fleiri en aðfluttir þannig að flutningsjöfnuður þeirra er neikvæður um 745.

Þessi þróun bendir því til þess að erlendum ríkisborgurum komi til með að fækka á fyrirliggjandi ári og reikna má með að þeim komi til með að fækka enn frekar á næsta ári miðað við stöðu og horfur í efnahags- og atvinnumálum hér á landi.

Það er ekki bara að erlendum ríkisborgurum hafi fækkað á árinu heldur hefur þeim sem eru með íslenskan ríkisborgararétt einnig fækkað. Þannig voru aðfluttir íslenskir ríkisborgarar 2.072 en brotfluttir 4.021 og var flutningsjöfnuður þeirra því neikvæður um 1.949.

Samkvæmt nýjum tölum frá Hagstofunni í Noregi þá eru Íslendingar sjötti stærsti hópur innflytjenda þar í landi. Þannig hafa um 1.300 Íslendingar flutt til Noregs á fyrstu 9 mánuðum þessa árs en til samanburðar má nefna að þeir voru um 200 á sama tíma árið 2008.