Renault gæti hætt vegna svindl ásakanna

Bernie Ecclestone segir að Renault sé í slæmum málum ef rétt reynist að liðið hafi vísvitandi beðið Nelson Piquet að keyra á vegg í Singapúr kappakstrinum í fyrra til að liðisinna Fernando Alonso. FIA, alþjóðabílasambandið er að kanna sannleiksgildi þess og skoða gögn um nýjar sannanir sem sagðar eru að séu komnar fram.

Piquet var rekinn frá liðinu fyrir nokkrum vikum og virðist hafa ýtt undir sögusagnir um að Renault hafi svindlað í fyrra. Beðið hann að klessa bíl sinn til að Alonso gæti nýtt sér færið, en hann vann sigur í mótinu. Piquet neitaði alfarið í fyrra að þetta væri rétt, en grunsemdir vöknuðu eftir mótið.

"Ég veit ekki hvort þetta er rétt eða rangt, að Renault hafi haft rangt við. Þetta hljómar undarlega. Ef þetta reynist rétt, þá er Renault í verulegum vandræðum og gæti fengið stranga refsingu. Maður hefur heyrt af svona í fótbolta og veðreiðum", sagði Ecclestone.

Hann hefur mestar áhyggjur af því að Renault hætti hreinlega í Formúlu 1, ef liðið verður dregið til ábyrgðar í málinu, ef rétt reynist.

"Þetta gæti bara verið hluti af fýlukasti Piquet, en ef hann er að segja þessa hluti, þá er þetta svipað og ef bankaræningi klagar í lögguna... En þessi umræða er ekki góð fyrir Formúlu 1 og veðbankar eru ekki hressir af frétta svona hluti. Við höfum ekki efni á því að Renault menn fari í fýlu og hætti eins og Honda og BMW", sagði Eccelstone.