McFadden missir líklega af leiknum gegn Íslandi

James McFadden, leikmaður Birmingham og skoska landsliðsins, verður frá næstu tvo mánuðina og er talið hæpið að hann verði orðinn klár fyrir leiki Skotlands gegn Hollandi og Íslandi í undankeppni HM 2010.

Skotland leikur gegn Hollandi á útivelli þann 28. mars næstkomandi og tekur svo á móti íslenska landsliðinu þann 1. apríl.

„Takmarkið er að hann verði orðinn klár eftir átta vikur," sagði Alex McLeish, stjóri Birmingham, á heimasíðu félagsins en McFadden er meiddur á hné. „Hann þarf sem betur fer ekki að fara í aðgerð," bætti hann við en fimm leikmenn liðsins hafa þurft að fara í aðgerðir vegna meiðsla síðan að tímabilið hófst.

Hollendingar eru með fimm stiga forystu á toppi riðilsins með níu stig en bæði Ísland og Skotland eru með fjögur. Ísland hefur þó leikið einum leik meira en hin liðin tvö.