Vísitala framleiðsluverðs hækkaði um 0,3%

Vísitala framleiðsluverðs fyrir sjávarafurðir var 229,2 stig, sem er hækkun um 4,1% (vísitöluáhrif 1,4%) frá fyrri mánuði og vísitala fyrir stóriðju var 205,1 stig, lækkaði um 4,5% (-1,5%). Vísitalan fyrir matvæli lækkaði um 0,9% (-0,1%) frá september og vísitala fyrir annan iðnað hækkaði um 3,1% (0,6%).

Vísitala framleiðsluverðs fyrir vörur sem framleiddar voru og seldar innanlands hækkaði um 0,3% (0,1%) milli mánaða en vísitala fyrir útfluttar afurðir hækkaði um 0,2% (0,2%).

Miðað við október 2008 hefur vísitala framleiðsluverðs staðið í stað en verðvísitala sjávarafurða hækkað um 1,4%. Á sama tíma hefur verð á afurðum stóriðju lækkað um 17,7% en matvælaverð hefur hækkað um 8,6%.