Hermann Guðmundsson og NOVA hlutu Markaðsverðlaunin

Markaðsfyrirtæki ársins 2009 er fjarskiptafyrirtækið NOVA og Markaðsmaður ársins 2009 er Hermann Guðmundsson.

Markaðsverðlaun ÍMARK voru veitt í hádeginu í dag og fór verðlaunaafhendingin fram á Hilton Reykjavík Nordica.

Í tilkynningu segir að sem fyrr var fjölmennt við afhendingu verðlaunanna enda vekur viðburðurinn ávallt athygli í íslensku viðskiptalífi.



Forseti Íslands hr. Ólafur Ragnar Grímsson, afhenti verðlaunin fyrir hönd ÍMARK og er í 19. sinn sem verðlaunin eru veitt.

NOVA var valinn Markaðsfyrirtæki ársins 2009 en auk þess voru CCP, N1 og Vodafone tilnefnd til verðlaunanna. Þessi fyrirtæki hafa sýnt frábæran árangur hvert á sínu sviði og síðastliðið ár hefur reynt verulega á áræði og þor til að ná árangri sem eftir er tekið.

Hermann Guðmundsson forstjóri N1 var valinn Markaðsmaður ársins 2009.

Ræðumaður dagsins var Edda Heiðrún Geirsdóttir markaðsstjóri Össurar sem var markaðsfyrirtæki ársins 2008. Hún fjallaði um árangur fyrirtækisins á liðnu ári.