Mikil aukning á grófum skattsvikum í Danmörku

Mikil aukning hefur orðið á grófum skattsvikum, sem tilkynnt eru til lögreglunnar, í Danmörku á síðasta ári. Þannig voru tilkynningarnar orðnar rúmlega 100 fleiri á fyrstu þremur ársfjórðungum ársin en allt árið 2007.

Í frétt um málið í Jyllands-Posten segir að skattsvik upp á meira en 100.000 danskar kr. eða 2,2 milljónir kr., eru ætíð kærð til lögreglunnar. Þessi tilfelli voru 304 talsins á fyrstu þremur ársfjórðungum 2008.

Skattsvikin eru einkum algeng meðal brotajárnsala, þeirra sem nota erlent vinnuafl í svartri vinnu, vínsmyglara og þeirra sem geyma fé sitt í skattaskjólum fyrir utan Danmörku.

Þá kemur fram að samkvæmt upplýsingum frá gagnabanka Danmerkur, Statistikbanken, var óvenjumikið um fjársvikamál í Danmörku á síðasta ári. Voru þau 4.669 talsins á fyrstu níu mánuðum ársins eða rúmlega 450 fleiri en á sama tíma árið áður.

Peter Nörregard sérfræðingur hjá Skattinum í Danmörku segir að ástæðan fyrir þessi aukningu sé einfaldlega sú að það er auðveldara að stunda skattsvik og fjársvik þegar uppsveifla er í efnahagsmálum landsins en þegar kreppa ríkir.