Baugur, Straumur og Glitnir gera kröfur í þrotabú Morten Lund

Baugur, Straumur og Glitnir eru meðal kröfuhafa í þrotabú Morten Lund fyrrum eigenda Nyhedsavisen í Danmörku. Lund var úrskurðaðir persónulega gjaldþrota af Sjó- og kaupréttinum í Kaupmannahöfn í gærdag.

Kröfur Baugs, Straums og Glitnis í þrotabúið nema 75 milljónum danskra króna eða um 1,7 milljörðum kr..

Í frétt um málið á vefsíðunni Business.dk segir að Morten Lund hafi fallið með hvelli en kröfurnar í þrotabúið nema samtals 120 milljónum danskra króna eða um 2,7 milljarða kr..

Af þessari upphæð eru 5-6 aðilar sem gera kröfur upp á 100 milljónir danskra króna en kröfuhafar eru á bilinu 10 til 20 talsins að því er skiptastjóri þrotabúsins segir. Meðal þeirra má nefna Skype-milljarðamæringinn Janus Friis.

Skiptastjórinn, Claus Abildström, segir að það geti reynst flókið mál að safna saman þeim eigum sem eru til staðar í þrotabúinu. Þær liggja að mestu í félögum sem eiga í öðrum félögum sem aftur eiga í félögum bæði innan Danmerkur og erlendis.