Verktakar þola ekki meiri samdrátt

Forstjóri verktakafyrirtækis segir verktaka í jarðvinnu- og byggingariðnaði ekki þola meiri samdrátt. Hann biðlar til stjórnvalda og hvetur þau til að hefja arðbærar framkvæmdir.

Hópur verktaka og starfsmanna þeirra ætla á morgun að afhenda fjárlaganefndarmönnum áskorun. Svokölluð Verktalalest verður farin frá Hafnarfirði klukkan korter í tvö sem endar niður við Alþingi. Hópurinn skorar á þingheim að auka við fjárheimildir til framkvæmda og ráðast þegar í stað í arðbærar framkvæmdir.

Hilmar Konráðsson, forstjóri verktakafyrirtæksins Magna, fullyrðir í samtali við fréttastofu að engin önnur starfsgrein hafi orðið fyrir jafn miklum samdrætti og niðurskurði hér á landi eins og jarðvinnu- og byggingariðnaðurinn. Árið 2007 hafi 17.500 manns starfað við mannvirkjagerð en vegna samdráttar hafi þeim fækkað um 10.000 á þessu ári.

Hilmar segir að fyrir Alþingi liggi tillaga um 60% samdrátt í framkvæmdum milli ára. Þeir fjármunir dugi einungis fyrir þeim framkvæmdum sem nú þegar hafi verið settar af stað. Það þýði að engin ný útboð muni líta dagsins ljós á næsta ári. „Ef ríkið ætlar að draga svona mikið saman verður það náðarhöggið fyrir okkur."

Hilmar segist skilja klemmuna sem stjórnvöld séu í þegar kemur að ríkisfjármálunum. „Þetta snýst ekki um það hverjir eru stjórn heldur erum við að reyna að benda mönnum á að hugsa þetta til enda. Maður skilur klemmuna sem stjórnvöld eru í en við þolum ekki svona mikinn samdrátt."