Eignir lífeyrissjóða hækkuðu um 26 milljarða í september

Hrein eign lífeyrissjóðanna var 1.734 milljarðar kr. í lok september sl. og hækkaði um 26,1 milljarðar kr. í mánuðinum. Sé miðað við september 2008 hefur hrein eign hins vegar lækkað um 49,2 milljarðar kr. eða 2,8 %.

Þetta kemur fram í hagtölum Seðlabankans. Þar segir að lækkunin milli ára skýrist af stærstum hluta af þeim miklu sviptingum sem áttu sér stað á íslenskum fjármálamörkuðum í október 2008.

Sú breyting hefur átt sér stað að afleiðusamningar sem áður hafa verið undir liðnum aðrar eignir, eru nú sýndir í liðnum afleiðusamningar. Fram kemur að afleiðustaðan er neikvæð um tæpa 66 milljarða kr. Í september var staðan neikvæð um rúmar 500 milljónir kr. en í september í fyrra var staðan neikvæð um tæpa 40 milljarða kr.

„Vert er að taka fram að enn er nokkur óvissa um endanlegt mat á eignum lífeyrissjóðanna," segir í hagtölunum.