Engar skuldir afskrifaðar hjá 1998

Arion banki hefur móttekið tilboð frá Jóhannesi Jónssyni kaupmanni, erlendum fjárfestum og stjórnendum Haga um fjárhagslega endurskipulagningu 1998 ehf., móðurfélags Haga. Samkvæmt tilboðinu kemur ekki til neinna afskrifta skulda 1998 ehf, segir í tilkynningu frá bankanum.

Þar segir ennfremur að Arion banki þurfi að taka sér tíma til að meta tilboðið og bera saman við aðra kosti í stöðunni þar sem málið er flókið að sögn.

Bankinn segir það vera í samræmi við þá meginreglu bankans að leita lausna á skuldavanda fyrirtækja með eigendum og stjórnendum.

Niðurstöðu varðandi tilboðið er því að vænta um miðjan janúar.

Þá segir í tilkynningunni: „Starfsfólk bankans áréttar að í þessu máli er unnið eftir verklagsreglum bankans sem eru í samræmi við lög um aðgerðir í þágu einstaklinga, heimila og fyrirtækja vegna banka- og gjaldeyrishrunsins, sem nýverið voru samþykkt á Alþingi."