Engin bankaafgreiðsla á Hofsósi

Engin bankaafgreiðsla er á Hofsósi eftir að útibú Nýja Kaupþings lokar þar. Þetta kemur fram í ályktun byggðarráðs Skagafjarðar sem mótmælir áformum um lokun bankaútibúsins.

Byggðarráðið undrast að gripið sé til þessara aðgerða hjá ríkisbanka stuttu áður en nýir eigendur taki við rekstri hans. Þjónusta bankans hafi haft mikla þýðingu fyrir íbúa svæðisins og bendir byggðaráðið á að langt sé í næstu bankastofnanir. Byggðarráð skorar á stjórn bankans að endurskoða þessi áform þar sem þau muni án efa leiða til fækkunar viðskiptavina og ólíklegt að þau skili bankanum þeim fjárhagslega ávinningi sem stefnt sé að.

Loks segir byggðarráðið að verði lokun afgreiðslu Nýja Kaupþings banka að veruleika skori byggðarráð á aðrar bankastofnanir að opna afgreiðslu á staðnum og stuðla þannig að góðri þjónustu við íbúa svæðisins.