Umfangsmikil rannsókn sem snertir meintar millifærslur Singer & Friedlander

Rannsókn efnahagsbrotadeildar bresku lögreglunnar á Kaupþingi í Bretlandi er sú umfangsmesta sem stofnanir erlendra ríkja hafa ráðist í vegna íslenskra fyrirtækja. Rannsóknin beinist meðal annars að millifærslum frá Singer & Friedlander, dótturfélagi Kaupþings, sem og lánveitingum til þekktra viðskiptavina.

Fréttastofa hefur heimildir fyrir því að breska efnahagsbrotadeildin, SFO, muni á þriðjudag gera nánari grein fyrir hvað felst í þessari rannsókn. Í bresku blöðunum í dag kemur fram að stjórnarmenn Singer & Friedlander hafi þegar leitað til breska lögfræðingsins Ian Burton sem sérhæfir sig í fjársvikamálum.

SFO hefur undanfarna fjóra mánuði haft Kaupþing til skoðunar. Þriggja manna teymi á vegum SFO var hér á landi í október og skiptist á upplýsingum og gögnum við starfsmenn embættis sérstaks saksóknara auk þess að njóta liðsinnis Evu Joly. Skoðun SFO hefur fyrst og fremst beinst að breskum hagsmunum, m.a. Edge reikningunum. Sögusagnir af háum millifærslum frá útibúi Kaupþings, Singer og Friedlander, rétt fyrir hrun voru um tíma háværar. Davíð Oddsson, fyrrverandi seðlabankastjóri, sagði m.a. fyrr á árinu að þessar millifærslur hefðu numið 800 milljónum punda og verið ástæða þess að Bretar beittu hryðjuverkalögunum á Landsbankann þar í landi.

Fyrrverandi stjórnendur bankans hafa alltaf haldið því fram að engar óeðlilegar millifærslur hafi farið frá bankanum á þessum tíma. Samkvæmt heimildum fréttastofu er þetta þó eitt af þeim atriðum sem breska efnahagsbrotadeildin hyggst rannsaka sem og háar lánveitingar til ýmissa viðskiptavina.

Meðal þeirra sem bresku blöðin nefna eru Robert Tchenguiz en hann sat í stjórn Existu sem var um tíma stærsti eigandi Kaupþings. Robert og Vincent bróðir hans fengu rúmlega 286 milljarða króna að láni frá Kaupþingi. Þá er Kevin Stanford líka nefndur en félög tengd honum fengu rúmlega 103 milljarða króna lán.