HS orka komin í eigu erlendra aðila

HS orka, orkufyrirtæki Reyknesinga, er nú að meirihluta í eigu erlendra aðila. Nefnd um erlendar fjárfestingar hefur vikum saman fjallað um kaup kanadíska félagsins Magma Energy á stórum hlut í fyrirtækinu. Reiknað er með niðurstöðu eftir áramót.

Kanadíska félagið Magma Energy á ríflega fjörutíu prósenta hlut í orkufyrirtæki Reyknesinga HS orku. Geysir Green Energy á svo tæp sextíu prósent. Aðrir eiga minna.

Geysir Green Energy má segja að sé komið í hendur banka að mestu leyti; Landsbanka og svo Íslandsbanka. Íslandsbanki er svo aftur, að níutíu og fimm prósentum í eigu erlendra kröfuhafa.

Skoðum þetta nánar:

Magma, raunar í gegnum sænskt skúffufélag, á ríflega fjörutíu prósent. Geysir tæp sextíu. Ætla má að Íslandsbanki ráði fyrir um fjörutíu prósentum hlutafjár í Geysi. Þá má ef til vill segja, með nokkrum rétti, að Íslandsbanki, með sitt erlenda eignarhald, hafi óbein yfirráð yfir fimmtungi HS orku. Sumir hinna erlendu kröfuhafa munu vera frá ríkjum utan Evrópu.

Þar með hafa erlendir aðilar með beinum og óbeinum hætti öðlast meirihluta í HS orku.

Samkvæmt lögum mega Íslendingar einir, og raunar aðilar innan Evrópska efnahagssvæðisins, eiga hlut í orkufyrirtækjum.