Höfuðstöðvarnar fluttar til að liðka fyrir samningum

Líklegt er að höfuðstöðvar HS Orku í Reykjanesbæ verði fluttar til Grindavíkur til að liðka fyrir samningum um orkuöflun í landi sveitarfélagsins. Þetta fullyrða Víkurfréttir, aðal fréttarit Suðurnesja.

Blaðið segir ekki hægt að lesa annað úr fundargerð bæjarráðs Grindavíkur þar sem fulltrúar B-lista fagna því „að bæjaryfirvöld telji sig geta farið saman inn í samningagerð við HS Orku um landakaupamál, nýtingu auðlinda, nýtingarstefnu, eldfjallagarð, auðlindahús og flutning höfuðstöðva HS Orku til Grindavíkur," eins og segi í bókun B-listans.

Víkurfréttir höfðu áður greint frá því að komin væri meiri þíða í samningaviðræður HS orku og bæjaryfirvalda eftir að HS Orka samþykkti að smærri og meðalstór fyrirtæki í Grindavík hefðu forgang að orku úr landi Grindavíkur umfram álverið í Helguvík.