Kaupþing tekur yfir rekstur Pennans

Nýi Kaupþing banki mun taka yfir rekstur Pennans ehf en undanfarna mánuði hefur bankinn átt í viðræðum við eigendur fyrirtækisins um endurskipulagningu á fyrirtækinu til að bjarga rekstrinum. Í tilkynningu frá Nýja Kaupþingi segir að gert sé ráð fyrir að rekstur Pennans á Íslandi verði að mestu leyti með óbreyttu sniði.

Penninn var stofnaður 1932 og hefur í áranna rás þjónustað fyrirtæki og einstaklinga með bækur, ritföng, skrifstofuvörur og húsgögn. Undir rekstur Pennans heyra m.a. verslanir Eymundsson, Griffill, Bókabúð Máls & Menningar, Islandia og Saltfélagið.