Kröfuhafar DeCode ósáttir

Kröfuhafar Decode gerðu athugasemdir við söluna á íslenska hluta félagsins við gjaldþrotadómstól í Bandaríkjunum. Að mati þeirra er sala á félaginu einungis innherjum í hag, kaupverðið of lágt og óttast þeir að viðkvæmar upplýsingar úr gagnagrunni verði seldar. Lögmaður Decode, segir í samtali við fréttastofu að dómstóllinn hafi þegar úrskurðað um athugasemdir kröfuhafanna og hafi þeim verið vísað á bug.

Í nóvember bárust fréttir af því að Íslensk erfðagreining héldi velli í að minnsta kosti 2 ár eftir að móðurfélagið, Decode, fór í gjaldþrotameðferð. Það var Saga Investments sem gerði kauptilboð í Íslenska erfðagreiningu en tvö fjárfestingafélög standa á bak við Saga. Kröfuhafar hafa nú gert athugasemdir við söluna og sent mótmæli inn til gjaldþrotadómstólsins í Delaware í Bandaríkjunum. Í athugasemdunum, sem fréttastofa hefur undir höndum, segir m.a. að ekki hafi verið tekið tillit til hagsmuna kröfuhafa heldur hafi upprunalegir fjárfestar, sem hafi átt í langvarandi sambandi við stjórn Decode fengið verulega stóran hluta eigna félagsins á silfurfati.

Þeir fjárfestar hafi í samráði við ýmsa fyrrum og núverandi stjórnendur og lykilstarfsmenn Decode gert kauptilboðið. Þeir hafi m.a. vilja tryggja að þeir haldi störfum sínum eða fá sambærilegar stöður í hinu nýja félagi. Þá eru tímamörk sem sett voru til að skila inn öðrum tilboðum gagnrýnd og þau sögð vera hönnuð til að koma í veg fyrir að aðrir fjárfestar gætu gert tilboð í Íslensku erfðagreiningu. Þá er það einnig nefnt að Saga Investments muni við söluna eignast gagnagrunn Íslenskrar erfðagreiningar sem mikill styr stóð um hér á landi þegar stofnun hans var heimiluð; en upplýsingar um alla Íslendinga áttu að fara í grunninn, nema þeir segðu sig úr honum sérstaklega.

Kröfuhafar segja að í kauptilboðinu komi fram að gagnagrunnurinn verði áfram háður persónuvernd. Hún heimili ekki að gögn séu sýnd þriðja aðila. Hinsvegar sé hugsanlegt að félagið reyni að hámarka hagnað sinn með því að markaðssetja gagnasafnið til þriðja aðila, líkt og vísindamanna eða lyfjafyrirtækja. Kári Stefánsson, stofnandi Decode, sagðist í samtali við fréttastofu ekkert hafa um málið að segja heldur biði hann niðurstöðu gjalþrotadómstólsins þann 14. janúar næstkomandi. Rétt fyrir kvöldfréttir hafði lögmaður Decode hins vegar samand og sagði að dómstóllinn hafi þegar vísað athugasemdunum á bug.