Dalvíkurbyggð: 95 milljóna króna afgangur á næsta ári

Samkvæmt fjárhagsáætlun Dalvíkurbyggðar fyrir næsta ár er gert ráð fyrir að A hlutinn skili afgangi uppá ríflega 114 milljónir króna og A og B hlutinn samanlagt skila afgangi uppá ríflega 95 milljónir kr.

Bæjarstjórn Dalvíkurbyggðar tók fjárhagsáætlun fyrir árið 2010 til fyrri umræðu á fundi sínum þann 8. desember. Bæjarstjórnin stendur öll að áætluninni.

Í tilkynningu segir að traustur rekstur og miklar framkvæmdir á árinu einkenna áætlunina. Veltufjárhlutfall er 1,23 og handbært fé frá reksti er áætlað um 281 milljónir kr.

Fjárfestingar eru um 324 milljónir kr. Þar bera hæst lok framkvæmda við nýja íþróttamiðstöð og búnaðarkaup vegna hennar, samtals uppá 284 milljónir kr. Þá er nokkru fé varið til gatna og gangstétta og ýmissa umhverfisverkefna. Fyrirtæki sveitarfélagins eru einnig í framkvæmdum s.s. Vatnsveita og Hafnasjóður. Auk þess verður unnið að ýmsum viðhaldsverkefnum.

Tekjuáætlun A hluta byggir á því að útsvar og fasteignaskattar skili sömu krónutölu og á árinu 2009 en að minna fáist úr Jöfnunarsjóði sveitarfélaga. Skatttekjur eru því 19 milljónum kr. lægri en á árinu 2009. Gjaldskrár breytast lítið, leikskólagjöld eru óbreytt annað árið í röð.

Á árinu er fyrirhugað að taka lán uppá 105 milljónir kr. og er það eina lánið sem tekið er vegna byggingar íþróttamiðstöðvar en heildarkostnaður vegna hennar verður á árinu 2010 orðinn um 544 milljónir kr.

Eigið fé sveitarfélagsins vex á árinu úr 1.214 milljónum kr. í árslok 2009 í 1.309 milljónir kr. í árslok 2010 eða um 95 milljónir kr. Á sama tíma aukast skuldir sveitarfélagsins við lánastofnanir um 56,5 milljónir kr. Skuldir við lánastofnanir eru áætlaðar um 1.078 milljónir kr., þar af eru um 409 milljónir kr. vegna félagslegra íbúða.