Erfiðleikar Breta koma við kaunin á Íslendingum

Slæm staða breska hagkerfisins kemur sér illa fyrir hið íslenska en Bretland er afar mikilvægur útflutningsmarkaður fyrir íslenskar sjávarafurðir.

Fjallað er um málið í Morgunkorni greiningar Glitnis. Þar kemur fram að af gjaldeyristekjum af vöruútflutningi komu ríflega 12% frá Bretlandi í fyrra. Hafa Bretar einnig lagt íslensku hagkerfi til verulegar gjaldeyristekjur með ferðamennsku hingað til lands.

Þá hefur stór hluti af útrás íslenskra fyrirtækja og fjárfesta á undanförnum árum verið inn á breska markaðinn. Talsverðar eignir eru því ennþá þar og verðgildi þeirra mun t.d. hafa áhrif á uppgjör bankanna og hversu mikið af innlánsskuldbindingum mun falla á íslenska skattgreiðendur.

Mikið fall pundsins hefur hins vegar gert það að verkum að krónan hefur haldið betur verðgildi sínu gagnvart pundinu en flestum öðrum myntum. Þannig hefur krónan lækkað um 29% gagnvart pundinu á síðustu tólf mánuðum á sama tíma og það hefur lækkað um ríflega 49% gagnvart dollaranum og 43% gagnvart evrunni.