Stjórnvöld í Bretlandi og Mön í deilu vegna Kaupþings

Stjórnvöld í Bretlandi og á eyjunni Mön eru nú komin í deilu vegna innistæðna í Kaupþingi á eyjunni. Deilan snýst um hvort tryggingar breskra stjórnvalda fyrir innistæðum í íslensku bönkunum nái yfir eyjaskeggja.

Mön heyrir ekki beint undir bresku krúnuna heldur er sjálfstjórnarsvæði. Singer & Freidlander bankinn var með útibú á Mön þegar Kaupþing komst í þrot. Alls áttu eyjaskeggjar um 880 milljón punda, eða rúmlega 130 milljarða inni hjá Kaupþingi er bankinn féll.

Í frétt um málið á Bloomberg-fréttaveitunni segir að það auðveldi ekki eyjaskeggjum að ná þessa fjármuni sína endurgreidda að Barak Obama næsti forseti Bandaríkjana studdi væntanlega löggjöf þar í landi, er hann var öldungardeildarþingmaður, sem stimplaði Mön sem mögulega miðstöð fyrir skattsvik.

Á Mön, sem telur um 80.000 manns, eru nú yfir 100 bankar og fjármálafyrortæki starfandi. Samanlögð velta þeirra síðasta haust nam 132 milljörðum dollara eða yfir 16.000 milljörðum kr. samkvæmt upplýsingum frá fjármálaeftirliti eyjunnar.

Stjórnvöld á Mön verða að bíða fram til 29. janúar eftir því hvort þau neyðist sjálf til að tryggja fyrrgreindar innistæður eyjaskeggja.

Allan Bell ríkisstjóri Manar segir í samtali við Bloomberg að þetta sé eitt versta vandamál sem eyjan hefur staðið frammi fyrir á síðari árum.