Straumur: Kröfuhafar hittast á Hilton í dag

Fundur kröfuhafa í Straumi verður á Hilton hótelinu í Reykjavík í dag. Í breska blaðinu the Guardian er því haldið fram að sumir smærri kröfuhafa séu óánægðir með sinn hlut í goggunarröðinni en Georg Andersen forstöðumaður samskiptasviðs Straums segir að þvert á móti sé mjög gott samkomulag við kröfuhafana.

Georg segir að á fundinum í dag verði ekki fjallað um málefni dótturfélaga Straums eins og CB Holding sem á knattspyrnuliðið West Ham, heldur afmarkast fundurinn við málefni móðurfélagsins.

Á föstudag verður tekin ákvörðun í Héraðsdómi Reykjavíkur um áframhaldandi greiðslustöðvun Straums. Að sögn Georgs hefur Straumur lokið sinni vinnu en lengri tíma þurfi til þess að dómskerfið geti klárað þau mál sem tengjast félaginu.