Sérstakur saksóknari aflaði gagna í húsleit hjá Byr

Menn á vegum Ólafs Haukssonar sérstaks saksóknara öfluðu gagna í húsleit í Byr í dag í framhaldi af rannsókn þeirri sem Fjármálaeftirlitið vísaði til sérstaks saksóknara varðandi eignarhaldsfélagið Exeter Holdings.

Trausti Haraldsson, upplýsingafulltrúi Byr, segir að eins og áður hefur komið fram í fjölmiðlum að þá hefur Fjármálaeftirlitið vísað máli vegna láns sem Byr sparisjóður veitti eignarhaldsfélaginu Exeter Holding í október og desember 2008 til sérstaks saksóknara.

Staða mála er sú að rannsókn málsins er í gangi og liður í henni er að starfsmenn sérstaks saksóknara komu til Byrs sparisjóðs til að fá nánari upplýsingar um málið og hafa starfsmenn Byrs verið í fullu samstarfi við þá, að sögn Trausta.

Ólafur Þór Hauksson, sérstakur saksóknari, vildi ekki staðfesta þetta í samtali við fréttastofu en sagði embættið vera í ákveðnum aðgerðum. Von væri á yfirlýsingu síðar í dag.

Upphafleg rannsókn Fjármálaeftirlitið beindist að viðskiptum félags í eigu Ragnars Z. Guðjónssonar forstjóri Byrs og nokkurra annarra stjórnenda sjóðsins með stofnfjárhluti í Byr. Félagið var Húnahorn.

MP Banki gerði veðkall í hlut Húnahorns í Byr. Fljótlega eftir það rann hluturinn inn í félagið Exeter Holdings, félags í eigu Ágústs Sindra Karlssonar, fyrrverandi stjórnarmanns MP.

Rannsókn FME virðist beinast að því að grunur leikur á að Húnahorn hafi selt hlut sinn beint til Exeter Holdings sem hefur fjármagnað 1,8 prósent hlut sinn í Byr með yfirdráttarláni frá Byr.

„Við misstum hlutinn en framseldum hann ekki til Exeter Holdings. Við eigum skjöl sem sýna að hluturinn fór frá okkur til MP Banka. Hvað gerðist síðan í framhaldinu verða aðrir að svara til um," sagði Ragnar í samtali við visir.is í mars s.l.

Stjórn Byrs lánaði Exeter Holdings 1,1 milljarð á yfirdráttarláni fyrir kaupum á hlutum í Byr. Samkvæmt heimildum Vísis eru þar inni hlutir sem MP Banki hefur tekið veðkall í á undanförnum mánuðum. Meðal þeirra sem misst hafa bréf eru stjórnarmenn Byrs, sömu menn og tóku ákvörðun um að fjármagna hlutabréfaeign Exeter Holdings í Byr.