Svartsýni neytenda færist í vöxt að nýju

Greining Íslandsbanka fjallar um málið í Morgunkorni sínu. Þar segir að þrátt fyrir þessa lækkun mælist gildi vísitölunnar nú töluvert hærra en það var á sama tíma fyrir ári, auk þess hærra en það hefur að jafnaði verið frá hruni bankanna. Í nóvember í fyrra mældist vísitalan 23,2 stig og frá hruni bankanna hefur hún að meðaltali verið um 31 stig.

Er því ljóst að íslenskir neytendur telja ástandið nú ekki jafn slæmt og fyrir ári og aðeins bjartara en það hefur að jafnaði verið frá hruni bankanna. Það var Capacent Gallup sem birti þessar niðurstöður könnunnar sinnar nú í morgun.

Allar undirvísitölur Væntingavísitölunnar lækkuðu á milli október og nóvember síðastliðinn sem bendir til þess að væntingar neytenda til núverandi ástands í efnahags og atvinnumálum jafnt og ástandsins eftir sex mánuði eru minni nú en fyrir mánuði síðan. Ætla má að væntingar neytenda um skattahækkanir hafi haft áhrif á þessa mælingu í október.

Mat á núverandi ástandi lækkar um rúmt stig og mælist 8,5 stig en væntingar til ástandsins í efnahags- og atvinnumálum eftir 6 mánuði lækka um rúmlega 5 stig og mælast 68,1 stig. Um 76% svarenda telja að efnahagsástandið sé slæmt um þessar mundir og um helmingur þeirra telja að atvinnumöguleikar séu litlir.

Þá telja ríflega 38% svarenda að efnahagsástandið verði verra eftir 6 mánuði og 25% að atvinnumöguleikarnir verði minni eftir þann tíma. Einnig telja 41% þeirra að heildartekjur þeirra muni lækka á næstu sex mánuðum.