Óheppilegt að bankafólk í þröngri fjárhagsstöðu ráðgefi um fjármál

Það hafa alltaf gilt mjög strangar reglur um fjárhagsstöðu bankastarfsfólks segir bankastjóri Arion og það er óheppilegt að fólk í þröngri fjárhagsstöðu sé að ráðleggja viðskiptavinum um fjármál.

Allir starfsmenn bankans fengu í gær bréf þar sem fram kom að þeir sem nýti sér greiðsluaðlögun vegna fjárhagserfiðleika verði fluttir til í starfi eða sagt upp störfum.

Í bréfinu kom fram að tilflutningi í starfi eða uppsögn verði ekki beitt í þeim tilvikum þegar starfsfólk nýtir sér greiðslujöfnun, skuldaaðlögun eða þaðan af vægari skuldaúrræði. Þurfi starfsmaður hinsvegar að nýta sér róttækari leiðir líkt og greiðsluaðlögun verður viðkomandi fluttur til í starfi eða sagt upp.

Um innri reglur bankans er að ræða en þær hafa verið við lýði frá árinu 2004. Stjórn bankans hefur nú samþykkt að ofangreind útfærsla af þeim gildi til ársloka 2010. Finnur Sveinbjörnsson, bankastjóri Arions, sagði í samtali við fréttastofu að það hefðu alltaf gilt mjög strangar reglur um fjárhagsstöðu bankastarfsfólks.

Með greiðsluaðlögun sé nánast verið að svipta fólk fjárræði þó það sé ekki gjaldþrota. Það sé óheppileg staða að starfsmenn í þröngri fjárhagsstöðu séu að ráðleggja viðskiptavinum um fjármál.

Finnur segir ennfremur að starfsmenn hafi að undanförnu kallað eftir upplýsingum um hvaða leiðir bankinn hyggist fara í þessum efnum. Hann efast um að margir starfsmenn bankans þurfi að nýta sér róttækari úrræði líkt og greiðsluaðlögun og því snerti þetta ekki marga innan bankans.