Grindavík hefur aldrei unnið oddaleik hjá konunum

Grindavíkurstúlkur þurfa að brjóta blað í sögu félagsins ætli þær sér að vinna oddaleikinn gegn KR í dag og komast þar með í undanúrslit úrslitakeppni Iceland Express deildar kvenna.

Kvennalið Grindavíkur hefur nefnilega aldrei unnið oddaleik í sextán ára sögu úrslitakeppni kvenna en leikurinn í DHL-Höllinni í dag verður fimmti oddaleikur Grindavíkur frá upphafi. Grindavík hefur spilað alla þessa leiki á útivelli og svo verður einnig raunin að þessu sinni.

Það munaði ekki miklu í fyrsta oddaleiknum fyrir sextán árum síðar. Grindavík var þá í heimsókn í Keflavík og var 55-56 yfir þegar tæp mínúta var til leiksloka. Keflavík skoraði fjögur síðustu stigin í leiknum og það var síðan Kristín Blöndal sem tryggði Keflavík 59-56 sigur með því að setja niður tvö vítaskot á úrslitastundu.

2003 tapaði Grindavík 54-74 fyrir KR í oddaleik undanúrslitanna en leikurinn fór fram í DHL-Höllinni. Bandaríski leikmaður KR, Jessica Stomski, var með 31 stig og 25 fráköst í leiknum eða 22 stigum og 17 fráköstum meira en bandaríski leikmaður Grindavíkur, Denise Shelton.

Árið eftir tapaði Grindavík 62-66 í hörkuleik í Keflavík þegar liðið spilaði oddaleik gegn Keflavík um sæti í lokaúrslitunum. Grindavík byrjaði vel og var 39-34 yfir í hálfleik en það dugði ekki til.

Grindavík var einnig í oddaleik í DHL-Höllinni í fyrra og tapaði þá með 14 stigum, 83-69. KR-ingarnir Hildur Sigurðardóttir og Sigrún Ámundadóttir áttu þarna báðar mjög góðan leik og skoruðu saman 41 stig auk þess að taka saman 16 fráköst og gefa saman 13 stoðsendingar.

Tveir leikmenn Grindavíkurliðsins í dag hafa verið með i þremur af þessum fjórum oddaleikjum. Það eru þær Petrúnella Skúladóttir og Jovana Lilja Stefánsdóttir sem voru með Grindavík í oddaleikjum 2003, 2004 og 2008.

Ólöf Helga Pálsdóttir hefur verið stigahæsti íslenski leikmaður Grindavíkur í tveimur síðustu oddaleikjum liðsins en hún hefur skorað 15 stig í þeim báðum þar af hitti hún 6 af 10 skotum sínum í fyrra og tók 10 fráköst í leiknum í Keflavík fyrir fimm árum.

Oddaleikir Grindavíkur í sögu úrslitakeppni kvenna

... um sæti í lokaúrslitum:

1993: Keflavík 59-56 Grindavík

2003: KR 74-54 Grindavík

2004: Keflavík 66-62 Grindavík

2008: KR 83-69 Grindavík