Styrktarsjóður Oxford háskóla tapar miklu á íslensku bönkunum

Uppgjör fyrir síðasta ár hjá styrktarsjóði Oxford háskólans sýnir að sjóðurinn hefur minnkað um 14% á árinu. Er það einkum vegna taps sjóðsins á hruni íslensku bankana í haust sem kostaði Oxford um 30 milljón pund eða hátt í 6 milljarða kr..

Í frétt um málið í Financial Times segir að Oxford sé þó langt í frá eini virðulegi háskólinn sem tapað hafi á íslensku bönkunum því með þeim í þeirri súpu eru nöfn á borð við Cambridge og Harvard.

Prófessor sem er sérfræðingur í fjármálum styrktarsjóða (endowment funds) segir að stefna þeirra hafi miðast við að dreifa áhættunni af fjárfestingum sem víðast til að draga úr henni. "Þessi stefna gekk ágætlega þar til á síðustu þremur mánuðum ársins 2008 þegar raqunveruleikinn gekk af henni dauðri," segir prófessorinn.

Oxford hefur ekki afskrifað inneign sína hjá íslensku bönkunum en endurheimt hennar er afar vafasöm.

Þrátt fyrir að hafa minnkað um 14% er styrktarsjóðurinn ekki á flæðiskeri staddur því eignir hans nema tæplega 600 milljón pundum eða nær 120 milljörðum kr..