Sjóður í eigu Milestone í London á leið í greiðslustöðvun

Fjárfestingarsjóðurinn Kcaj í London, sem er í meirihlutaeigu Milestone, gæti farið í greiðslustöðvun í þessari viku. Þetta kemur fram í Financial Times í dag.

Kcaj á hluti í nokkrum fyrirtækjum og verslunarkeðjum og greiðslustöðvun gæti leitt til brunaútsölu á eignum á borð við Jones the Bookmaker, Mountain Warehouse og Duchamp.

Tvö af fyrirtækjum Kcaj eru þegar komin í þrot, það er Hardy Amies (fyrrum klæðskerar Bretadottningar) og Ghost og hið þriðja, verslunarkeðjan Blooming Marvellous, rambar á barmi gjaldþrots.

Hinsvegar munu aðrar fjárfestingar Kcaj ekki vera í hættu, eins og t.d. Cruise og Aspinalls of London enda gengur rekstur þeirra vel.

Kcaj var stofnað af Jón Scheving Thorsteinssyni og var lengi í eigu fjárfestingarfélags hans Arev áður en meirihluti sjóðsins var seldur til Milestone í fyrra. Nöfnin Kacj og Arev eru tekin úr sjónvarpsþáttunum Coronation Street.

Askar Capital annast nú rekstur Kcaj fyrir Milestone og hefur Financial Times eftir Bjarka Brynjarssyni forstöðumanni fjárfestinga hjá Askar að verið sé að skoða hvernig hag kröfuhafa verði sem best borgið. Sala á eignum kemur þar til greina.